自卑

尋晚臨瞓同太太講起，我睇完啲大師嘅書， 覺得有時一個人嘅成就，係俾家境出身限制咗好多。 出世家境好有充足資源嘅人，對比基層出身嘅人， 即使個性一樣好都會比基層多好多機會， 想學乜讀乜去邊度見識，都唔需要儲錢， 用少好多時間就達到其他人大半世甚至幾世人都未必做到嘅成就。 當然有錢人都有佢哋嘅煩惱，但冇人會想體驗做基層面對果種絕望。

出身好嘅人擁有充足嘅資源，容許到佢哋爬上人類嘅頂峰。 出身寒微，以香港標準相對， 攞非洲同大陸比無意義，亦唔需要搵殘障人士同我鬥慘。 老豆爛賭走佬、單親家庭，細個住山邊石屋、徙置區、公屋， 三十幾歲人先第一次搭飛機。

由細到大都俾屋企忽略，又或者佢哋唔識得表達愛， 所以我極度自卑，亦因為咁我好想成功。

---

未夠好

曾經我以為只要我夠叻夠成功， 其他人就會尊重我、愛我， 所以不停去證明自己好、值得被愛。

而家人到中年，曾經有一剎那諗過， 我嘅成就係咪就嚟盡，咁就一世。 然而做唔到最頂1%嘅人係咪就冇價值呢？

自卑、自閉再加上我係一個悲觀嘅人， 自然睇嘢成日都見到隻杯半空，而唔係半滿。 心理醫生話我咁樣只會見到自己未有嘅嘢而見唔到擁有嘅嘢， 會容易唔開心，永遠覺得自己「未夠好」，唔值得被愛。 不停要求自己要做到最頂1%有甚至 0.1% 嘅人實在太harsh， 太介懷人哋點睇自己只會逼死自己。 而且醫生話呢樣嘢係好難醫， 可以做嘅就只能盡量令自己aware個心有好多個洞， 人哋對我嘅好同讚美都會喺呢啲洞到跌走左。 我都好討厭自己咁樣，慶幸嘅係太太話我而家開始會意識到已經好好。

---

感恩

後來明白， 當人哋有幾代人累積嘅資源集中落去幾個人度， 一開角色就已經重課神裝滿等， 無課嘅就算點逼自己去一日農怪 48 小時都唔可能追到， 亦唔應該去追，因為個 ground 同 scale 都唔同。

一個人嘅成就係應該同自己比較， 有冇比以前嘅自己做得更好？ 人哋過成點係人哋嘅事， 不要去羨慕、不要去妒忌， 專注係自己身上，做人就會開心正面好多。

有車、有樓、有愛我嘅人係身邊， 自己同屋企人身體算健康， 有三隻貓、有份穩定本行嘅工返、 有讀過碩士、有時間練功做自己想做嘅嘢， 有本事移居兩次回流一次完， 仲一年返到香港旅行兩次甚至去轉日本。 只要收入再搵返多定啲、打到自己工，人生就已經好完滿。 我明白其實對比起好多人，我已經好幸福。

---

多謝你自己

最後要同自己講嘅係：多謝你自己。

即使你前半生過得艱難， 然而你都仲可以一路走來披荊斬棘， 單靠自己得到咁多嘢仲養起頭家、 亦有人認同你嘅努力同埋能力， 最重要嘅係有愛你嘅人，所以⋯⋯

杜偉倫，其實你好叻仔架喇。☺️

Dear Ferry, You’ve Got This!